{[['']]}
ആലപ്പുഴ: യുവതാരങ്ങളായ ഫഹദ് ഫാസിലും നസ്രിയ നസീമും വിവാഹിതരാകുന്നു. ഫഹദിന്റെ പിതാവും പ്രശസ്ത സംവിധായകനുമായ ഫാസിലാണ് വാര്ത്ത പുറത്തുവിട്ടത്. ഓഗസ്റ്റില് വിവാഹമുണ്ടാകുമെന്നും വീട്ടുകാര് ഉറപ്പിച്ച കല്ല്യാണമാണിതെന്നും ഫാസില് അറിയിച്ചു. എന്നാല് തീയതി നിശ്ചയിച്ചിട്ടില്ല. ഇപ്പോള് അഞ്ചലി മേനോന്റെ ചിത്രത്തില് അഭിനയിക്കുന്നതിനായി ബംഗലൂരുവിലെ ലൊക്കേഷനിലാണ് ഇരുവരും. ബ്ലെസിയുടെ അടുത്ത ചിത്രത്തിലും ഇവരാണ് നായക ജോഡികള്.
നസ്രിയയെ ബാലതാരമായ കാലം മുതലേ അറിയാവുന്നതാണെന്നും താന് നസ്രിയയുടെ വീട്ടുകാരെ വിളിച്ച് വിവാഹക്കാര്യം സംസാരിക്കുകയായിരുന്നെന്നും ഫാസില് പറഞ്ഞു. നസ്രിയയുടെയും ഫഹദിന്റെയും സമ്മതമറിഞ്ഞതോടെ വിവാഹം ഉറപ്പിക്കുകയായിരുന്നു. ഇത് പ്രേമവിവാഹമല്ലെന്നും കുടുംബങ്ങള് തമ്മില് ആലോചിച്ചുറപ്പിച്ചതാണ് വിവാഹമെന്നും ഫാസില് പറഞ്ഞു.
ന്യൂ ജനറേഷന് ചിത്രങ്ങളിലെ മുന്നിര താരങ്ങളാണ് ഫഹദും നസ്രിയയും. ഇവരുടെ വിവാഹ വാര്ത്തയില് അമ്പരന്നിരിക്കുകയാണ് സിനിമാലോകം. ഫഹദ് 'അന്നയും റസൂലും' എന്ന ചിത്രത്തിലെ നായികയായ ആന്ഡ്രിയാനയുമായി പ്രണയത്തിലാണെന്ന് നേരത്തേ വാര്ത്തകള് പരന്നിരുന്നു.
Post a Comment